Siðareglur Suðurhlíðar
Samþykktar á stjórnarfundi Suðurhlíðar
Markmið
Markmið siðareglna Suðurhlíðar er að vernda réttindi þjónustuþega og styðja starfsfólk þegar það stendur frammi fyrir siðferðilegum álitamálum.
Mikilvægt er að siðareglurnar séu í stöðugri endurnýjun og að starfsfólk yfirfari þær reglulega.
Í Suðurhlíð er rík áhersla lögð á virðingu fyrir þeim sem þangað leita. Starfsfólk vinnur út frá því að mæta þjónustuþegum eftir þeirra þörfum, veita ráðgjöf og aðstoða þá við að komast í rétt úrræði og að öðlast betri líðan.
Siðreglurnar ná til starfsfólks Suðurhlíðar og þau sem veita ráðgjöf á vegum Suðurhlíðar en vinna hjá samstarfsaðilum. Þegar fjallað er um starfsfólk í siðareglunum á það við alla þessa aðila.
Ábyrgð gagnvart þjónustuþegum Suðurhlíðar
1. Starfsfólk gætir þess að grundvallar mannréttindi, sjálfsákvörðunarréttur og réttur þjónustuþega til einkalífs sé virtur. Starfsfólk leitast við að byggja upp gagnkvæmt traust og veita ráðgjöf sem einkennist af heiðarleika og virðingu. Þau sem nýta sér viðtöl eða hópastarf Suðurhlíðar skulu ávallt njóta sjálfsstjórnar og taka ákvarðanir á eigin forsendum.
2. Starfsfólk mismunar ekki þjónustuþegum heldur veitir öllum sömu eða sambærilega þjónustu án tillits til uppruna, þjóðernis, stéttar, tungumáls, litarháttar, trúarbragða, lífs-, stjórnmálaskoðana, trúleysis, kyns, kynhneigðar, kynvitundar, kyntjáningar, kyneinkenna, aldurs, fötlunar,
holdafars, líkamsgerðar, heilsufars, atgervis eða annarrar stöðu. Það er hlutverk starfsfólks að vera meðvitað um stöðu mismunandi samfélagshópa sem leita til Suðurhlíðar. Einnig þarf starfsfólk að huga að áhrifum eigin gilda, lífsskoðana og forréttinda á ráðgjöfina sem þau veita.
3. Starfsfólk gætir þess að staða þeirra og kunnátta sé ekki notuð til að misbjóða, undiroka, skaða eða kúga þjónustuþega bæði í einstaklings- og hópastarfi. Starfsfólki er einnig óheimilt að nýta sér tengsl við þjónustuþega sér til persónulegs eða faglegs framdráttar. Ekki er heimilt að vísa
þjónustuþegum í þjónustu sem starfsfólk eða einhver þeim skyldur eða tengdur hefur fjárhagslegan ávinning af að veita.
4. Það er á ábyrgð ráðgjafa að stofna ekki til kynferðislegs eða persónulegs sambands við þá einstaklinga sem koma í viðtöl, hvorki í raunheimum né í gegnum samfélagsmiðla/netið. Það sama á við nema sem eru í þjálfun. Séu vensl, vinskapur eða kunningsskapur fyrirliggjandi milli
þjónustuþega og ráðgjafa þegar leitað er til Suðurhlíðar skal viðkomandi fá þjónustu frá ráðgjafa sem er honum/henni/hán ókunnugur.
5. Starfsfólk hefur ekki samband við þjónustuþega að eigin frumkvæði nema til að staðfesta tímapantanir í viðtal, bjóða viðkomandi í hópastarf eða gefa aðrar nauðsynlegar upplýsingar.
6. Starfsfólki er óheimilt að taka við gjöfum eða þiggja þjónustu frá þjónustuþegum Suðurhlíðar. Undanskyldar þessu eru smágjafir sem hafa lítið verðgildi og skulu þær þá renna til Suðurhlíðar. Suðurhlíð sem félagsamtök getur hins vegar tekið við gjöfum frá þjónustuþegum.
7. Starfsfólk sinnir ekki starfi sínu undir áhrifum áfengis eða annarra efna sem kunna að hafa áhrif á dómgreind og athygli þeirra.
Trúnaður/þagnarskylda
8. Starfsfólk virðir trúnað við alla þá þjónustuþega sem leita til Suðurhlíðar. Starfsfólk ræðir ekki mál þjónustuþega Suðurhlíðar utan starfshópsins og greinir ekki frá persónugreinanlegum upplýsingum sem það fær vitneskju um í starfi sínu í Suðurhlíð, utan starfsstöðvar. Þagnarskylda sem
starfsfólk skrifar undir er það hefur störf, fellur ekki úr gildi við starfslok.
9. Starfsfólk gerir þjónustuþegum grein fyrir þagnarskyldu og trúnaði sem gildir um allt starf í Suðurhlíð. Þetta á við bæði um þjónustu sem einstaklingar fá og hópastarf. Þetta á sér stað í fyrsta viðtali/fyrsta hittingi í hópavinnu.
10. Þagnarskyldu/trúnað má aðeins rjúfa kveði lög á um það eða ef augljós hætta bíður þjónustuþega eða annarra. Starfsfólk skal gera grein fyrir öllum undantekningum á trúnaði/þagnarskyldu í byrjun fyrsta viðtals.
Almennar skyldur starfsfólks
11. Mikilvægt er að starfsfólk leggi sig fram um að viðhalda faglegri þekkingu og hæfni í vinnu með þolendum ofbeldis og málaflokknum. Starfsfólk er hvatt til að lesa faglegar greinar, sækja fagleg námskeið og kynna sér fræðirit er fjalla um ofbeldi og afleiðingar þess.
12. Komi upp siðferðisleg álitamál ber starfsfólki að leita ráða hjá teymisstjóra og eftir atvikum stjórn Suðurhlíðar. Stjórnin er ábyrg fyrir loka ákvörðunum er varða siðferðisleg álitamál séu þau lögð fyrir hana.
13. Beri svo við að starfsfólk komi fram eða skrifi opinberlega fyrir hönd Suðurhlíðar skal viðkomandi gæta þess að vera málefnaleg/ur/t í ræðu og riti og vinna þannig að því að viðhalda því trausti sem almenningur ber til Suðurhlíðar. Einnig er mikilvægt að starfsfólk geri skýran greinarmun á því hvenær viðkomandi talar opinberlega, fyrir eigin hönd eða í nafni Suðurhlíðar.
14. Vilji einstaklingur undir 18 ára nýta sér þjónustu Suðurhlíðar, ber starfsfólki að tilkynna ólögráða einstaklingnum að tilkynna beri það ofbeldi sem viðkomandi hafi verið beittur til barnaverndar. Þannig er það lagaleg skylda barnaverndar að útvega ólögráða einstaklingum viðeigandi aðstoð vegna ofbeldis sem þau kunnu hafa verið beitt og tilkynna forráðamönnum um slík brot, viti þau ekki af þeim.
15. Komi upp siðferðileg álitamál er það á ábyrgð ráðgjafa að ráðfæra sig við starfsfélaga um þau á teymisfundi þar sem teymisstjóri er viðstaddur.
Meðferð ábendinga/kvartana vegna starfsfólks
16. Ráðgjafi sem veit um brot starfsfélaga síns gegn siðareglum bregst við með ábendingu, umræðu og stuðningi við hann, svo leiðrétta megi. Ef það dugir ekki eða ef brotið er alvarlegt þarf að láta teymisstjóra vita eða stjórn eftir atvikum. Fulltrúar stjórnar ásamt teymisstjóra fara yfir
málsatvik og ákveða í framhaldinu hver næstu skref verða.
17. Ábendingar eða kvartanir vegna starfsfólks sem berast utan starfshópsins má bera fram við teymisstjóra eða stjórn Suðurhlíðar. Sé ekki hægt að leysa mál innan hópsins eða með atbeina stjórnar má hafa samband við fyrirtæki sem er sérhæft í starfsmannamálum.
Í alvarlegustu tilfellum um brot á siðreglum getur niðurstaðan verið tafarlaus uppsögn og er sú ákvörðun tekin af stjórn.